Tim de Ieërste – Prins vanne Foekepotters Grathem in 2025
Nieuws
Prins Tim Houben I
- Gegevens
Prins Tim Houben I
Mèt gezóndje spanning laefdje de Foekepotters en Foekepoterinnekes de aafgeloupe waeke toe nao ’t moment det de noewe prins vuuer ’t seizoen 2025/2026 bekindj zooj waere. Zón bietje róndj de fieëstdaag begós ’t sjpeculere. Waem zooj dit jaor de ker gaon trèkke?
Op 25 jannewari 2025 waas ’t zoeë wiet. Ieërst woor d’r nog de traditionele deenst in oos eige Sint Severinus kirk. Ónger ’t mótto Vrie en Blie waerdje ‘t mèt meziek van oos Borekepel en Noeri, Anieke en Ralf ein sjoeën en biezunjer bie-einkómst. Ouch waerdje de Voedselbank, oetgiftepuntj Baoksum, weer gesteundj mèt doeër de luuj mètgebrachte voedingsmiddele. Gesterktj met de zaengel van pesjtoeër waerdje vervolges nao Zaal Geraats getrókke. Dao óntvinge De Foekepotters häör zustervereiniginge van D’n Uul van den Grauwert oet Mofert, De Bôkkeriejers oet Sint Joeëst, de Plekploasters oet Baoksum en de Kwakkert oet Heitse mèt häör eige hoeëghede. ’t Prinsebal kós beginne.
Nao ’t aaftraeje van Prins Bert I waerdje ’t oetkeze van de noewe prins in henj gelachtj van eine magische “prinsesjpegel” dae waal zooi kinne vuuersjpèlle waem dit kieër gerope zooi zeen de Grathemse vastelaovesker te trèkke. Naodet inkele leje van de Foekepotters häör kandidaat aan deze sjpegel haje vuuergelagdj, kwoom ónger luid applaus en de toeëne van Door Diek en Dun (zónne goje höbbe wae ….) de noewe prins de bühne op. Nemes minder as Tim Houben, Prins Tim de Ieërste.
Tim is eine richtige Grathemse jong. Hae waerdje bienao zevenentwintjig jaor geleje geboeëre in ’t zekehoes in Wieërt, mer daonao rap nao thoes, Kasteelshof aan de Loordesjtraot in Grathem, verveurdj. Hae is noe dus zesentwintjig jaor. Tim is neet getrouwd, mer vrietj al inkele jaore mèt zien leef Marlou (Sillen) oet Sjwame. Net as Tim is Marlou gek vanne vastelaovendj. Zie is in eige dörp jeugdprinses gewaestj bie de Erpelkes. Tim woeënt nog altied bie pap en mam oppe Kasteelshof. Hae hieët drie jonger breurs die, net wie hae, van jongs aaf aan de henj oet de moewe höbbe gesjtoeëke in ’t fruitbedrief van vader Roger en moder Chantal.
Tim hieët de opleiding Mechatronica aan de Fontys hoeëgesjoeël in Venlo gevolgdj en daonao gewerktj bie Greymans Paktech in in Stramproy en vervolges in Venlo bie Sormac. Vuuer de ieërste óntwórp hae inpakmesjiene vuuer de voedingsmiddele-industrie, en bie dae letste mesjiene vuuer de greuntje- en fruitverwirking. Daovuuer zoot hae ouch dök in Amerika en Finlandj. Mer ’t blood kruiptj woeë ’t neet gaon kin, want inmiddels is Tim same mèt zien broor Tijs bie pap en mam in ’t bedrief gestaptj. Hae is ‘nne gruuetse fruitteler en same mèt zien broor al de veerdje generatie op Kasteelshof. En al hieët Tim krek wie zien broor get anges gelierdj, hae vindj ’t ein ieër en oetdaging óm aan waat opa en oma höbbe opgeboedj en pap en mam höbbe oetgebreidj, weer ein noew hoofdsjtök toe te veuge. Zoeë höbbe de breurs ein productielien opgezatte vuuer toelevering aan bekkerieje. Ouch höbbe zie zich toegelachtj oppe imkerie en is inmiddels echte Kasteelshofse honing te kriege, naeve appelesaap en sjroeëp van eige teeltj.
Tim is vanaaf 2012 lid van oos hermenie Sint Agatha en speeltj dao de tenor sax. Sinds 2016 versterktj hae daomèt ouch oos Borekepel. Det hieët hae van geine vraemdje, want mam waas vreuger lid vanne kepel in Kelpe-Oeëler. Ouch is Tim lid van ’t AJK (Agrarisch Jongeren Kontakt), heltj hae van motorrieje en waas hae lid en staflid bie JongNL. Aafgeloupe jaor leep Tim de Kennedymars.
Mèt de vastelaovendj laeftj Tim, dae normaal al neet van poppelappe is, nog net get heller as normaal. Zoeë lank wie hae zich kin herinnere duit hae al mèt aan de optocht. Ieërst in de bolderwage mèt mam en later same mèt pap en mam inne optochtgroep De Sjtuuekers en ouch bie de dames vanne Raod. Mer de letste jaore bie de eige vastelaoves en vrunjegroep V.G. Wurse Kwaod Óm. En, natuurlik is hae steeds vanne partie as oos Borekepel Door Diek en Dun acte de présence geuftj, woeëvan trouwes ouch zien drie breurs lid zeen. Eine goje pot beer en get sjaele kal is aan Tim waal besjtaedj en de vastelaovendj is hem mèt de appelmoos ingegaeve. As prins treutj hae noe in veutsjpoor van zien pap, Roger de Ieërste oet 2009.
Oze prins Tim de Ieërste zal tiedes de vastelaovendj waere óngersteundj doeër zien twieë adjudante: Mitchel en Mike. Hae zal bie de Foekepotters vuuerop gaon ónger ‘t mótto:
Appel of paer, ’t is mich óm ’t aeve
Wae gaon drie daag gaas gaeve!
Jeugdprinsenpaar oetgeroope! Jeugdprinses Reva I & Jeugdprins Thijs I
- Gegevens
Wae sjrieve 18 jannewari 2025. Inne zaal bie Geraats luptj de spanning al aardig op, want ’t zal neet mieër lank dore of ’t noewe jeugdprinsepaar zal oppe bühne versjiene. Ieërst waerdje nog dankjewel gezagtj taege prinses Amélie en prins Devin die in 2024 bie de jeugd van de Foekepotters de scepter höbbe gezweidj. Toen waerdje ’t tied vuuer ’t oetroepe. Nao ein spannendje en wervelendje show waerdje Reva Cuijpers en Thijs van Heugten geïnstalleerdj as Jeugdprinses en Jeugdprins. Zie sjtèlle zich gaer aeve aan uch vuuer.
Prinses Reva I:
Hoi, ich bèn Reva. Ich bèn 11 jaor geleje geboeëre in Knotsenburg (Nijmegen) en op mien 3dje nao ’t Foekepottersriek verhoesdj. Mien pap hètj Ruud en mien mam Carolien. Ich haoj hieël väöl van häör. Same mèt ós leef kat Timmie woeëne wae oppe Baoksummerwaeg. Mien superleef oma en opa woeëne ouch in Grathem.
Ómdet ich hie neet geboeëre bèn, höb ich flink mèt papa geoefendj óm plat te kalle. Ich vinj ’t sóms waal nog ein bietje lestig, dus sjtèl neet te hoeëg eise aan mien Grathems plat.
Ich zit op tennis en dao höb ich ein hieël leuk en gezellig gruupke. Wae traine elke vriedig en höbbe 2 kieër per jaor ein toernooi.
Ouch sjpeel ich al 3 jaor saxofoon en det vinj ich hieël sjiek óm te doon. Ich bèn bie Jong Tumult. Aafgeloupe jaor höb ich mien A-examen gehooldj en noe moog ich bie de groeëte hermenie. Dao bèn ich best gruuets op.
Elke maondig gaon ich nao JongNL, woeë ich mèt de meide en de gezellige leiding sjieke activiteite doon.
Eine angere hobby van mich is laeze. Beuk van Carry Slee, Donald Duck en Harry Potter laes ich ´t leefst. Ich haoj van sjpannnendje beuk die ouch grappig kinne zeen. Ich kin dao gans in opgaon. Ich höb ouch bienao alle films van Harry Potter gezeen, want ich bèn eine echte fan van hem. Ouch vinj ich Donald Duck leuk; elke vriedig viltj d’r ein Duckie inne bös.
Ich vinj ’t geweljig det ich same mèt Thijs, mien adjudant Julia en de jeugdraod deze vastelaovendj vuuerop moog gaon. Ich höb d’r hieël väöl zin in óm vastelaovendj same met mien familie en vrunj en uch allemaol te vere.
Prins Thijs I:
Hoi. Ich bèn Thijs en ich bèn 12 jaor. Ich woeën al 11 jaor in Grathem op oos boorderie aanne Hunselerdiek. Dao woeën ich same met miene pap Jules en mam Femke en mien breurke Wout, en mèt oos diere (eine hóndj, ein kat, drie paerd en hieël väöl kuukskes).
Ich bèn eine actieve kaerel en hoof mich neet te vervaele. Leefst sjpeel ich mèt mien vrunj en breurke boete en as ’t sjlecht waer is lekker inne loeëds. Ich vinj ’t sjiek as ich pap kin helpe mèt kukes laje of bie get anges. Later wil ich zelf ouch gaer kukeboor waere.
Mien paerdrielaarse höb is verwisseldj vuuer voetbalsjoon en ich sjpeel inds kort bie DFO’20 in Kelpe.
Verder tennis ich gaer ein pötje bie T.C. De Koel en bèn ich lid van JongNL. Ouch zet ich mich in bie de jeugdbrandjwaer in Nederwieërt.
Ich vinj ’t super ruig det ich noe same mèt Reva ’t jeugdprinsepaar moog zeen in 2025. Same mèt häör en mien adjudant Sjir, de jeugdraod en alle kinjer gaon ich d’r ein sjiek fieëst van make.
Prinses Reva I en jeugdprins Thijs I gaon regere onger huuer motto:
Mèt tennis ff geine bal sjlaon, den kinne wae mèt dees daag d’r hieëlemaol vuuer gaon!
Jeugdprinsepaar Devin I en Amélie I
- Gegevens
Tiedes ’t jeugdprinsebal op 20 jannewari 2024 waerdje Amélie Smeets en Devin van Zandvoort oetgerope es ’t noewe jeugdprinsenpaar van De Foekepotters in Grathem. Prinses Amélie de Ieërste en prins Devin de Ieërste sjtèlle zich gaer aeve aan uch vuuer.
Hoi. Ich bèn Amélie en twelf jaor geleje geboeëre in Remunj in ’t zekehoes, mer daonao rap nao hoes gekómme in Grathem en dao altied gewoeëntj. Ich höb ein breurke, Sebastiaan, en verder bestuit oos gezin oet pap Pascal en mam Chantal. Wae woeëne noe oppe Severinusstraot, mer det is toet det oos noewe hoes op Grasheim (’t aoje voetbalveldj) klaor is. Ich bèn lid van JongNL en vinj danse hieël sjiek. Edere waek gaon ich daovuuer nao danssjoeël Dédé Dance . Vastelaovendj vere vinj ich super sjiek, en det doon ich altied same mèt mien vriendin Liz. Wae verkleije ós den same en en doon in oze gelieke outfit mèt aan de disco, de kinjer- en groeëte optocht de sjoeëlvastelaovendj en alles waat d’r te doon is in ‘t Foekepotterslandj. Kei sjiek det Liz den ouch dit jaor mien adjudante is. Opa Jo oet Bieëgdje waas vreuger jaore lid van carnavalsvereiniging De Jokers en mien moder Chantal veertj dus al häör ganse laeve lank vastelaovendj. Dao zal ich ’t waal van höbbe. Ich vinj ’t super ruig det ich dit jaor jeugdprinses moog zeen en verheug mich d’r op óm d’r same mèt jeugdprins Devin, de adjudanten en de ganse jeugdraod ein tof fieëst van te make.
Ha. Ich bèn Devin, èlf jaor aod en vinj ‘t supertof det ich dit jaor es Devin de Ieërste jeugdprins bèn van De Foekepotters. Ich zit op sjoeël in Häör op de Latastesjoeël dao. Dao höb ich ’t super nao miene zin. Ich höb ein groeëte broor Jayden en ein jonger zuske Desney. Same mèt pap Remy en mam Jaqueline i soos gezin den compleet. Mien groeëte hobby is voetbal. Drie kieër in de waek bèn ich den ouch te vinje op ’t voetbalveldj in Kelpe woeë ich sjpeel in de jo13. Ouch höb ich lank taekwondo gedaon, mer dao bèn ich noe mèt gestoptj, ómdet ich dit jaor bie de jeugdbrandjwaer gaon. Ich vinj Xboxen ouch hieël vèt en es ’t waer good is kins se mich aan de bieëk zeen óm te vèsse. Zoeë, noe wetj gae get uuever mich. Ich höb d’r in elk geval väöl zin in óm mèt uch allemaol en mèt jeugdprinses Amélie, miene adjudant Guus en de ganse jeugdraod flink tegaenaan te gaon. Alaaf, alaaf, alaaf.
Groeët of klein, vastelaovendj vere wae same mèt ederein!
Bert I – Prins van De Foekepotters Grathem in 2024
- Gegevens
Op zaoterdig 27 jannewari 2024 hele De Foekepotters vuuer de 75e kieër häör prinsebal. De sfeer zoot d’r al sjnel good in, en de Foekepotters en Foekepotterinnekes wore natuurlik weer benoedj waem det häöre belangriekste man vuuer de kómmendje vastelaovendj zooi gaon waere. Net es de bezeukendje prinse van D’n Uul van de Grauwert oet Mofert, van de Plekploaster oet Baoksum, de Kwakkert oet Heytse en van De Bokkeriejers oet Sint Joeëst en häör gevolg, sjting ederein te wachte toet de noewe prins bekindj zooi waere. Want neet allein is ’t sjiek te weite waem, en of des se good geraoje höbs, mer ’t is ouch traditie det nao ’t oetrope ein fantastisch fieëst lastbarstj bie Zaal Geraats.
Dus, dao ging ’t loos. De oetroopceremonie besjting oet “De Aoje Grathemer” ein Grathemse versie van ’t OLS. Naodet diverse sjötters haje gemistj, sjoot de letste gelökkig raak en sjting hae oppe bühne, oose noewe prins: Bert Engelen, Prins Bert I.
Bert is eine richtige Grathemer. Hae waerdje hie geboeëre en hieët zien ganse laeve in oos dörpke gewoeëndj. Hae is 3 x 11 jaor aod en veertj zoeë lank es hae zich kin herinnere al vastelaovendj. Same mèt ziene vrinjegroep APK hieët Bert jaorelank wages geboedj en mètgetrokke inne optocht. Daobie veel häör vakmansjap en aafwerking op, mer ouch de sjieke presentatie. Zie vele den ouch dök in de prieze. Bert woeëntj mèt zien leef Lindy (Op het Veld), ein maedje oet Putbrook, aan de randj van Grathem. Same höbbe zie twieë kinjer, Sen van vief en Bente van drie jaor.
Bert werktj bie de Groba es service engineer. Groba meuktj mesjiener vuuer ’t verwerke van kieës, en zónger Bert geit det neet. Hae seistj daovuuer de ganse waereldj uuever óm die dinger te installeren, óngerhaoje en te programmere. Verder is Bert eine henjige jóng. Waat hae zuut kin hae make. Hae klustj gaer aan hoes of bie femilie of vrunj. Ziene vrieje tied spendeertj hae gaer aan de kinjer, woeë bie ein oetsjtap nao sjpeeltuin of dierentuin hoeëg scoortj. Ouch wanjele mèt de hóndj vindj Bert sjoeën. Es ’t aeve kin is ein vakantie mèt de caranvan same mèt Lindy en de kinjer ouch get waat Bert hieël gaer duit. Bert is lid van CV De Foekepotters en actief in de werkgroep jeugd van oose dörpsraod. Dao helptj hae mèt bie de organisatie van versjillendje activiteite wie de intocht van Sinterklaos, Kuueningsdaag of ’t Statie Rouke.
Kortom. Bert is eine fijne en good gezene mins in oos dörp dae al jaore op zien eige meneer zien biedrage levertj in oos gemeinsjap. De Foekepotters zeen den ouch gruuets det hae es Prins Bert I tiedes de vastelaovendj vuuerop zal gaon. Bert hieët zich verzekerdj van de hulp van twieë adjudante, namelik Ron Steijven en Barry Evers. Hae zal bie de Foekepotters vuuerop gaon ónger zien motto: Noe geine boe of robot programmere, óm mèt uch keihel vastelaovendj te vere.
Jan-Willem I – Prins van De Foekkepotters 2023
- Gegevens
Zaoterdig 28 jannewari letst waas ’t zoeë wiet. Nao twieë jaor van wachte wore De Foekepotters en Foekepotterinnekes natuurlik zeer benoedj waem det zie es noewe prins zoje moge begroete. De sjtumming waas den ouch opperbest, want ederein haai waal weer zin in ein fieëstje. In eine bomvolle zaal waerdje, ónger ’t toezeendj oug van de hoeëghede van D’n Uul van de Grauwert oet Mofert en de Bokkeriejers oet Sint Joeëst, en natuurlik de Grathemse luuj de 74e prins van De Foekepotters oetgerope. En waat vuuer eine:
Nemes minder es Jan-Willem Sniekers, Prins Jan-Willem I.
Jan-Willem de Ieërste hieët zich verzekerdj van de sjteun van twieë adjudante, te weite Martijn Bidlot en Wil Daemen. Hae zal tiedes de vastelaovendj bie De Foekepotters vuuerop gaon ónger zien mótto:
Jonk en aod, niks te gek,
Vastelaovendj in Grathem, det is nog geine poppedrek!
Jeugdprinsepaar 2023 Bram I en Pleun I
- Gegevens
Foekepotters en Foekepotterinnekes,
Hie noe vuuer uch, ós nuuj jeugdprinsepaar vuuer 2023!
Jeugdprins Bram I en Jeugdprinses Pleun I.
Same mèt häör adjudante Tijn en Floor regere zie ónger häör sjpreuk:
“Effe neet träöte of hiphoppe, wae zeen mèt dees daag neet te stoppe!”
Zomer vastelaovendj Zaterdag 21 mei 2022!
- Gegevens
Programma zaterdag 21 mei 2022
14.11 Optocht
15.30 Nassaupleinfestijn met diverse artiesten en activiteit voor de jeugd.
19.30 Foekepop
Jeugdprinsepaar Jenaplanbasissjoeël De Klink
- Gegevens
Aafgeloupe maondig hieët Jenaplanbasissjoeël De Klink häör eige jeugdprinsepaar oetgerope, jeugdprins Tonphi en jeugdprinses Bente! Helaas höbbe wae met de kapel bie ut oetroope “zonne goeie” neet kinne spelen. Names Boorekapel Door DIEK en DUN höbbe os muzikanten Sandra en Ilse aevegood un presentje aangebaoje aan ut jeugdprinsepaar!
Vastelaovendj 2020/2021
- Gegevens
Leef Foekepotters en Foekepotterinnekes,
Eine tied lank höbbe wae de hoeëp gehadj det de vastelaovendj in welke vorm den ouch doeër zooj kinne gaon. Helaas mótte wae noe constatere det wae mèt alle maotregele die recent zeen getróffe, geine vastelaovendj kinne veere wie wae det gewintj zeen same.
In eder geval haet C.V. de Foekepotters besjloate óm gein Jeugdprinsepaar en Prins vanne Foekepotters oet te rope vuuer 't vastelaovesseizoen 2020/2021. Ouch zulle d'r gein activiteite georganiseerdj waere in 't vuuerseizoen (Bóntje Aovendje en Senioremiddig). De uueverige activiteite die wae normaal tiedes de vastelaovendj same met uch veere zulle ouch neet doeër gaon (Prinsereceptie, Gala-Zitting, Foekepop, Kinjer- en Groeëte Optochtj, Groeëtste Boor).
Zoje de maotregele 't toesjtaon inne aanloup nao de vastelaovendj den zal C.V. de Foekepotters de meugelikheje ongerzeuke op det moment en uch dao uuever informere. Volg hie veur ut letste nuujs van CV de Foekepotters.
Wae hoeëpe det gae allemaol gezóndj blieftj.
Prins Mike de 1e! De 71e prins van de Foekepotters Grathem
- Gegevens
De prins veur ut seizoen 2020 is nemes minder den: Mike Evers, prins Mike de ieërste.
Hae zal De Foekepotters veurgaon ónger zien motto:
"Mèt Vastelaovendj van kracht, gaon wae fieëste toet wiet inne nacht!"
Ein geweldige proclamasie, veural ten 9e...
"Det wae mèt Door Diek en Dun mèt meziek doeër de straote gaon en nemes mieër stil kan blieve staon. Wae moge gruuets zeen op zo’n sjieke borekepel, mèt nemes minder as miene naef Kevin op dae verrèkdje koebel!"